Координаторот на советничката група на СДСМ од Охрид, Јован Стојаноски, обвини дека на седницата на Советот на Општина Охрид, на многу нетранспарентен начин советниците на ВМРО-ДПМНЕ изгласаа „расипнички ребаланс на буџетот“.
– Од проектираните зголемени 67 милиони денари во буџетот, тие наместо за капитални и за развојни инвестиции, најголемиот дел од 36 милиони денари, пари на граѓаните, проектирале да бидат потрошени за реконструкција на градскиот кеј Македонија. Во Охрид, очигледно, на повидок е уште еден проект на трошење пари за чоколадо, што би рекол Ставрески, во услови кога градот кубури со средства за елементарен опстанок – додава Стојаноски.
Граѓаните, смета Стојаноски, имаат многу други, приоритетни, потреби. Затоа се потребни промени за реален, домаќински и долгорочен развој на Охрид за тој повторно да биде атрактивен град за живеење, наместо да има највисока стапка на иселувањето во државата.
– Бакрачески и неговиот ментор Груевски треба да им одговорат на граѓаните на Охрид дали скапиот кеј во градот е за народните пари да завршат во нивни џебови по примерот на „Скопје 2014“ – обвинува Стојаноски.
Од локалната самоуправа одговорија дека СДСМ е без чувство за минимум политичка, а особено граѓанска одговорност.
– Напоменуваме дека парите од ребалансот на буџетот ќе се трошат за видливи проекти, кои ќе бидат од општа корист за граѓаните на Охрид, вклучително и градскиот кеј, кој ќе ја зголеми атрактивноста на градот. Парите нема да бидат потрошени за проекти кои никаде до ден-денес ги нема, онака како што тоа го правеа нивните ментори од минатата локална власт, кои денес се нивни идоли – велат од локалната самоуправа.
