Како претпоставен јавен обвинител во Обвинителството за организиран криминал и за корупција, Јован Илиевски не може да биде изземен од постапување по конструираниот предмет „Пуч“ затоа што по принципот на хиерархија и субординација на Обвинителството, директно е претпоставен на обвинителот што постапува по конструираниот предмет, изјави денеска портпаролот на СДСМ, Петре Шилегов, а како реакција на официјалното соопштение на Јавното обвинителство дека јавниот обвинител Јован Илиевски бил изземен од предметот „Пуч“.
– Во согласност со хиерархиската поставеност во Јавното обвинителство, баџанакот на Сашо Мијалков и извршителот на Никола Груевски, обвинителот Јован Илиевски, директно и индиректно има можност да влијае на одлуките што се однесуваат на предметот – рече Шилегов на денешната прес-конференција што ја одржа пред обвинителството.
Како што рече Шилегов, не постои ниту една основа за изземање на Илиевски според Законот за кривична постапка.
– Со ваквата реакција и однесување, Јавното обинителство потврди дека работи под целосен диктат и контрола на Никола Груевски, Сашо Мијалков и на Јован Илиевски – рече Шилегов.
