Поради погрешните политики на криминалната власт, Македонија загуби речиси 100 милиони евра неповратни средства од ЕУ за инфраструктури проекти кои можеа да се инвестираат во патишта, железници, водоводи, канализации и во инфраструктура, велат од СДСМ.
– Километар автопат во Македонија во моментов чини повеќе од километар автопат во земјите членки на ЕУ, како Бугарија, Хрватска, па дури и Данска. Во Бугарија цената за еден километар автопат изнесува околу 2 милиони евра, а во Македонија по првичните пресметки – околу 7 милиони евра. Тоа е огромна и нелогична разлика. Прашањето е зошто е толку голема разликата и каде завршуваат овие пари – вели Благој Бочварски, претседател на комисијата за транспорт и врски и член на извршниот одбор на СДСМ.
Тој вели дека криминалните политики се причина зошто Македонија некогаш била лидер во регионот според квалитетот на патиштата, а сега е на самото дно.
– Како резултат на ова, граѓаните во Македонија се движат по небезбеден пат. Во анализата на ЕУ за квалитетот и за безбедноста на патиштата, дури 39 проценти од патиштата во земјава се оценети за небезбедни и означени со црни точки. Македонија во регионот е зад Косово, БИХ и зад Србија. Корупцијата и криминалот директно влијаат на лошата состојба на патиштата што земаат многу жртви – вели Бочварски.
Тој додаде дека во ЕУ на два милиони жители просекот на жртви по патишта е 98, а во Македонија бројот на жртви е околу 150 лица годишно, но некогаш таа бројка достигнува и повеќе од 170 лица.