„Денеска почнува судско рочиште против граѓаните кои беа спречени да присуствуваат на седницата на Советот на Град Скопје, на која мнозинството предводено од ВМРО-ДПМНЕ одлучи да ги преименува улиците во Скопје. Граѓаните беа спречени и покрај тоа што седниците на Советот се јавни“, истакна на прес-конференција Саша Богдановиќ, претседател на Општинската организација на СДСМ во Центар.
– Денеска им се суди на граѓаните, кои сакаа да го искажат својот став против преименувањето на улиците во Скопје, против бришењето на хероите од НОБ, потценувањето на жртвите и значењето на народно ослободителното движење. Од друга страна, случаите кои не се однесуваат на лица блиски до неа, власта веднаш ги процесира со кривични пријави кои експресно се спроведуваат. И не само тоа. Дел од овие учесници беа наградени од ВМРО-ДПМНЕ, дури и со претседавачко место во Советот на Општина Ѓорче Петров. Во Македонија ниту има правда, ниту има правна држава. СДСМ, веднаш по промената на власта, ќе го врати правниот и уставниот поредок во државата – рече Богдановиќ.