Недозволиво е министерот за надоворешни работи на Грција, Евангелос Велизелос, да го злоупотребува членството на неговата земја во Европска Унија и од таа позиција да си дозволува да ја условува Македонија во врска со наметнатиот спор. „Ерга омнес“ е нелогично барање на Грција, што не води кон решавање на проблемот, реагираат денеска од СДСМ на вчерашната изјава на грчкиот шеф на дипломатијата, кој рече дека грчката влада останува на барањето за име со географска одредница, која се инсистира да стои пред името Македонија и кое ќе биде за севкупна, односно и за внатрешна и за надворешна употреба.
„Со ваквите ставови, грчкиот министер уште еднаш потврди дека наместо да се води од европските политики на 21 век, што подразбираат интегрирање, дијалог и меѓусебно почитување, Република Грција, за жал, сè уште живее во минатото. Погрешните политики на Никола Груевски, за контрола на медиумскиот простор, судството, државните институции, отвораат простор за злоупотреба од грчката политика и од секој недобронамерен политичар, кон Република Македонија“, се вели во соопштението од СДСМ.
