СДСМ денеска повторно ја обвини Владата дека не презема мерки за намалување на загаденоста на воздухот во Македонија.
„Граѓаните во Македонија со месеци дишат загаден воздух, полн со канцерогени честички ПМ10, кој е штетен за нивното здравје. Податоците од мерните станици покажуваат загадување на воздухот и во вечерните и во утринските часови. Според последните податоци, загадувањето на воздухот во Скопје речиси петпати ја надминува дозволената граница, во Битола седум пати, додека воздухот во Кичево, Кавадарци и во Тетово содржи четирипати повеќе канцерогени честички ПМ10 од дозволеното“, стои во соопштението.
Од партијата наведуваат дека провладините медиуми го кријат проблемот „штитејќи ги криминалните фамилијарно-тендерски политики на Никола Груевски и на ВМРО-ДПМНЕ“.
„Никола Груевски и ВМРО-ДПМНЕ потрошија 630 милиони евра за споменици, а граѓаните на Македонија дишат загаден воздух полн со опасни, канцерогени честички. Само дел од овие 630 милиони евра можеа да се инвестираат во животната средина и целосно да се реши проблемот со загадувањето на воздухот“, стои во соопштението на СДСМ.
