Советниците од СДСМ на денешната седница на Советот на Град Скопје побараа да се дискутира за уапсените студенти од протестите на 5 мај, како и за средношколските протести и за состојбата на средните училишта во Град Скопје, информираше потпретседателот на СДСМ, Дамјан Манчевски.
– Се работи за теми кои се поврзани со спонтаните граѓански протести пред Владата по објавувањето на вознемирувачките разговори во врска со обидот за прикривање на убиството на Мартин Нешковски, како и противењето на средношколците на лошите реформи во образованието. Се работи за институции кои се под надлежност на Градот – рече Манчевски.
Според Манчевски, помеѓу демонстрантите биле уфрлени и провокатори кои ја нападнале полицијата, а реакцијата на полицијата била брутална и со прекумерна употреба на сила. Во притвор се голем број студенти, кои се невини и на никаков начин немаат придонес во нападите врз полицајците.
– Имајќи предвид дека причина за протестите е обидот да се прикрие брутално убиство на невин млад човек од припадници на МВР, СДСМ бара итно ослободување на притворените невини студенти од протестите на 5 мај. Ослободувањето на притворените и повторното отворање на истрагата за убиството на Мартин Нешковски, само може позитивно да влијае на олабавување на политичката тензија што владее во државата, во исчекување на оставката на Никола Груевски – додаде Манчевски.
Тој вели дека за убиството мора да има и командна одговорност, како и одговорност за оние кои со денови се обидувале да го прикријат убиството. Од СДСМ бараат итно покренување истрага и процесуирање на случајот за обидот за прикривање на убиството на Мартин Нешковски на сите инволвирани официјални лица од МВР.