Коце Трајановски и ВМРО-ДПМНЕ не работат во интерес на граѓаните и за тоа има само едно решение: оставка на Коце Трајановски и нови избори за градоначалник на Скопје, рече Дамјан Манчевски, потпретседател на СДСМ и координатор на советничката група на СДСМ и на коалициските партнери во Советот на Град Скопје, на денешната прес-конференција.

– Со буџетот за 2016 година, Никола Груевски и Коце Трајановски сакаат да продолжат по старо. Само за нови барокни фасади Коце Трајановски планира да потроши нови 5,7 милиони евра. За нови плоштади и за фонтани уште дополнителни 3 милиони евра. А само за одржување на фонтаните и на спомениците уште 500.000 евра. За Градската куќа следната година ќе се потрошат нови 2,6 милиони евра. Врв на забеганоста, безобразлукот и на луксузирањето се 500.000 евра за пристапни површини околу гламурозното партиско седиште на ВМРО-ДПМНЕ. Приоритет за Коце Трајановски е партиското седиште на ВМРО-ДПМНЕ, а не изградбата на комунална инфраструктура за цело Скопје бидејќи за цела година предвидени се 750.000 евра за таа намена. За Коце Трајановски, партијата секогаш била и ќе биде поважна од граѓаните на Скопје – вели Манчевски.

Тој вели дека за СДСМ и за коалицијата овој буџет е апсолутно неприфатлив и преку амандамни бараат повеќе пари за реконструкции на училишни згради, за надвозници и за пешачки мостови, за изградба и за реконструкција на велосипедски патеки, субвенции за велосипеди за граѓаните, мерки за намалување на загаденоста на воздухот, повеќе паркови и зеленило, гасификација на средните училишта, бесплатен јавен превоз за студентите секој ден, бесплатен здрав оброк за учениците во средните училишта, како и за расчистување диви депонии.