По кој критериум докторите-специјалисти од Клиничкиот центар во Скопје и од болницата „8 Септември“ ќе добијат зголемување на платата, а оние доктори што работат во внатрешноста нема? Ова прашање го постави пратеничката Роза Топузова-Каревска од Либерално демократската партија на собраниската седница наменета за пратенички прашања. Прашањето беше наменето за министерот за здравство, Никола Тодоров, но тој не беше присутен на седницата и наместо него, одговор на прашањето даде заменикот-министер, Јовица Андовски. Тој истакна дека во мај оваа година, сите доктори добиле зголемување на платите за 19,2 проценти.
– Мене навистина не ми е јасно, како може едни доктори да добијат зголемување на платата, а други не. Кои критериуми ги употребивте кога ја носевте оваа одлука? Не сакам да ме разберете погрешно, мене ме радува тоа што конечно докторите нема да земаат плата како државна администрација, но не знам зашто платата им е зголемена само на докторите во Скопје. Ако сакате некои доктори да ги наградите затоа што работеле многу, дајте им награда на основната плата. Пред неколку минути, премиерот Никола Груевски, одговарајќи на претходното прашање, рече дека не треба да се дискриминираат студентите од внатрешноста. Зголемување на платите само на докторите од Скопје, не е дискриминација? – праша пратеничката Топузова-Каревска.
Пратеничката не беше задоволна од одговорот на заменик-министерот и уште еднаш го постави истото прашање, но побара да добие писмен одговор.
