Четиринаесетгодишно девојче е убиено откако руска бомба во североисточниот украински град Харков погоди игралиште, пишува Би-би-си.
Уште најмалку шест лица загинале, а 59 се повредени.
Претседателот Володимир Зеленски ги обнови своите повици до сите меѓународни партнери на Украина да и дозволат да погоди цели во Русија за да се спречат такви напади. Неговата канцеларија соопшти дека Руските сили истрелале повеќе од 400 беспилотни летала и проектили врз Украина во текот на изминатата недела.
Нападот се случи само неколку часа пред Зеленски да го разреши шефот на неговите воздухопловни сили, генерал-полковник Микола Олешчук.
Харков се наоѓа на околу 35 километри од руската граница и е цел на чести напади од почетокот на целосната инвазија на Русија во февруари 2022 година.
Регионалниот шеф Олех Синехубов на Телеграм рече дека најмалку 59 лица – меѓу кои девет деца – се ранети, од кои 20 се во тешка состојба.
Тој посочи дека нападите биле лансирани од рускиот регион Белгород, кој се наоѓа веднаш зад границата.
Зеленски рече дека Русија цели кон „обични“ луѓе и дека нападите би можеле да се спречат доколку Украина „има способност да уништи руски воени авиони“.
„Ова е апсолутно легитимна потреба. Не постои рационална причина за ограничување на одбраната на Украина“, кажува тој.
