Кога Марина Овсијаникова упадна во студиото на вечерните вести во понеделникот, осудувајќи ја војната во Украина и пропагандата околу неа, руските власти ја испрашуваа 14 часа и ја казнија со 30.000 рубљи 280 долари, пренесе Би-Би-Си.
Протестот на Овсијаникова, која има татко Украинец и мајка Русинка, го истакна тивкиот, но постојан прилив на оставки од строго контролираната руска државна телевизија.
Украинскиот претседател Володимир Зеленски ѝ се заблагодари, апелирајќи до секој кој работи за, како што го нарекува, рускиот пропаганден систем, да поднесе оставка. Секој новинар кој работи во, како што вели Зеленски, четвртата гранка на власта, ризикува санкции и меѓународен трибунал за „оправдување воени злосторства“, предупреди тој.
Некои од најголемите поддржувачи на рускиот претседател Владимир Путин на државната телевизија веќе се соочија со санкции, вклучувајќи го Владимир Соловјов кој води ток-шоу на најголемиот руски канал „Россија-1“ и Маргарита Симонјан која обвини дека секој што се срами дека е Русин во овој момент не е вистински Русин.
Неколку часа по протестот на Марина Овсијаникова, на виделина излегоа три оставки.
Новинарката на истата телевизија Канал 1, Жана Агалакова, ја напушти работата како дописник за Европа, додека двајца новинари ја напуштија ривалската НТВ. Лилија Гилдеева работеше за каналот како водителка од 2006 година, а Вадим Глускер беше во НТВ речиси 30 години.
Марија Баронова е најпознатата новинарка која поднесе оставка во РТ, порано позната како Русија денес (Russia today). Поранешната главна уредничка на РT му рече на Стив Розенбергод, Би-Би-Си овој месец дека г-дин Путин веќе го уништил угледот на Русија и дека и економијата е мртва.
Оставка поднесоа и голем број други новинари на РТ, вклучително и неруски новинари кои работат во редакциите на други јазици.
Поранешната дописничка од Лондон, Шадија Едвардс-Дашти ја објави својата оставка на денот кога Русија ја нападна Украина без да наведе причина. Новинарот од Москва, Џони Тикл, даде отказ истиот ден „во светло на неодамнешните настани“.
Францускиот водител на РТ, Фредерик Тадеи, рече дека ја напушта својата емисија затоа што Франција е „во отворен конфликт“ со Русија и дека не може да продолжи да ја води својата програма Забрането да се забрани „од лојалност кон мојата земја“.
Руската државна новинска агенција „Рупли“ со седиште во Германија, исто така, претрпе серија оставки, според новинската агенција Ројтерс.
Руските медиуми кои не се во Кремљ беа под постојани напади со години. Некои беа погодени со етикетата на странски агент од советската ера.
ТВ Дожд, која беше принудена да ги прекине и своите онлајн емитувања поради инвазијата во Украина, а голем број новинари избегаа од Русија заради своја безбедност.
Радио Ехо Москва, исто така, беше исклучено поради новото законодавство на Русија за таканаречените лажни информации. Би-Би-Си на руски е меѓу бројните западни медиуми кои се забранети, додека новинарите кои работат за Медуза со седиште во Латвија беа принудени да ја напуштат Русија.
Не исчезнаа само новинарите од државната телевизија.
Еден од најголемите руски водители на ток-шоу, Иван Ургант, направи пауза од неговото шоу „Вечер со Ургант“ во ударен термин на вториот најголем руски канал, Канал 1, истата станица како Марина Овсијаникова.
Тој реагираше против војната објавувајќи црн квадрат на својот Инстаграм профил со едноставна порака: „Страв и болка. Не за војна“. Оттогаш тој им порача на своите следбеници да не паничат и дека заминал на одмор и наскоро ќе се врати.
Руската славна двојка број еден Ала Пугачева и Максим Галкин се меѓу бројните други фигури на шоубизот кои исто така заминаа на одмор. Галкин на Инстаграм рече: „Не може да има оправдување за војна! Не за војна!
Водечката примабалерина на Бољшој, Олга Смирнова, која неодамна ја осуди воената инвазија на Украина, ја напушта земјата за да се приклучи на Холандскиот национален балет, пренесува Би-Би-Си.
Долгогодишната балетска првенка, Олга Смирнова (30) минатата недела рече дека е „против оваа војна со секое делче од мојата душа“ и дека ја поддржуваат други руски балерини.
Холандскиот национален балет во средата за Би-Би-Си потврди дека Смирнова веднаш ќе започне да работи со нивниот балетски ансамбл.
Директорот на ХНБ, Тед Брандсен ја опиша како „исклучителна танчерка“.
Смирнова има дедо Украинец и се опиша себеси како „една четвртина Украинка“.
Претходно овој месец, Смирнова рече:
Во модерен и просветлен свет, очекувам цивилизираните општества да ги решаваат политичките прашања само преку мирни преговори.
Никогаш не мислев дека ќе се срамам од Русија, отсекогаш сум бил горда на талентираните руски луѓе, на нашите културни и спортски достигнувања.
Но, сега чувствувам дека е повлечена линија што го дели претходното и потоа. Боли што луѓето умираат, што луѓето ги губат покривите над главата или се принудени да ги напуштат своите домови.
А кој би помислил пред неколку недели дека сето ова ќе се случи? Можеби не сме во епицентарот на воениот конфликт, но не можеме да останеме рамнодушни на оваа глобална катастрофа.
