Русија го повика Киев да ја прекине воената офанзива на истокот на Украина и нагласи дека новоизбраните проруски лидери имаат доволно авторитет и овластувања за да преговараат со Киев.
„Проруските лидери, кои вчера се избрани, имаат доволен авторитет да воспостават широко одржлив дијалог со киевските власти“, соопшти заменик шефот на руската дипломатија, Григориј Карасин, за ИТАР-ТАСС, откако официјална Москва го призна изборите во самопрогласените народни републики Донецк и Луганск.
– Дијалогот може да донесе резултати само под услов на рамноправност базирана на заемно почитување и доколку Киев се откаже од воените операции и „злогласните антитерористички операции“ – вели Карасин.
Коментирајќи ги санкциите со кои Западот ù се заканува на Русија поради спорните избори во самопрогласената народна република Донецк и народна република Луганск, Карасин рече дека „јазикот на санкциите е апсолутно контрапродуктивен метод за решавање на конфликт, што и историски е докажано“.
Според Карасин, сега е најважно да се преземат активни чекори за да се одржи дијалогот меѓу Киев и претставниците на Донбас. Тој додаде дека Москва ќе направи сè за да помогне во пронаоѓање решение.
