Проевропските партии во Романија постигнаа согласност да формираат владејачко мнозинствo што ќе му се спротивстави на екстремното десно крило, и најверојатно ќе поддржат еден единствен кандидат на повторните претседателски избори по поништувањето на изборите претходно месецов, пренесува Гардијан.
Владејачките левичарски социјалдемократи освоија најмногу места на парламентарните избори на 1 декември, што исто така доведе до тоа три ултранационалистички и екстремно десничарски групации, меѓу кои има и про-руски, да освојат повеќе од третина од местата.
Парламентарните избори беа одржани во два круга за време на претседателските избори, при што екстремно десничарскиот критичар на НАТО, Калин Георгееку, од релативно анонимна личност стана изненадувачки фаворит.
Ова предизвика обвинувања за руска вмешаност во изборите, пред целосно да биде поништен претседателскиот изборен процес, со најава дека целиот процес ќе мора да се повтори.
Новата влада треба да изготви нов календар за кога да бидат одржани претседателските избори, а се очекува тоа да се случи во првата половина на 2025 година.
Претседателот на Романија, Клаус Јоханис, ќе остане на функцијата до инаугурацијата на новиот претседател, иако тековниот мандат му завршува на 21 декември.
Социјалдемократите и нивните тековни коалициски партнери – централно-десничарските Либерали, центристичката „Унија за спас за Романија“ (Save Romania Union) и етничката Унгарска партија, се согласија брзо да формираат про-европска широка коалиција.
„Во наредните денови, четирите партии и претставниците на националните малцинства ќе работат на заедничка владина програма базирана на развој и реформи, кои ќе ги земат предвид приоритетите на романските граѓани“, се вели во заедничкото соопштение.
Партиите, исто така, изјавија дека разгледуваат поддршка на единствен про-европски кандидат на претседателските избори, со цел да ги зголемат своите шанси за победа.
Не е јасно дали на Георгееку ќе му биде дозволено да се кандидира повторно, бидејќи обвинителите ја истражуваат неговата кампања.
.jpg){kind=link}