Поддржувачите на „Шарена револуција“ остануваат оптимисти дека нивните барања ќе бидат исполнети до крајниот рок – 18 јуни.
Тие денеска поставија блокади на три мостови во Скопје – мостот Гоце Делчев, мостот Слобода и мостот Мајка Тереза (кај МАНУ).
На мостот Гоце Делчев демонстрантите го испишаа бројот два и напишаа „Ситно броиме“, потсетувајќи на рокот што го дадоа да се исполнат нивните клучни барања.
#ШаренРеволуција го испиша бројот два на мостот Гоце Делчев и напиша „Ситно броиме“ #протестирам pic.twitter.com/Kt5DIesKAz
— META.mk (@meta_agency) June 16, 2016
На новинарско прашање како го коментираат тоа што Уставниот суд на дневниот ред го нема поставено нивното барање за СЈО, Александар Младеновски соопшти дека сè уште има доволно време за да се направат промени.
– Во оваа држава сè е возможно, може во кој било момент нашето барање да се стави на дневниот ред на Уставен суд – рече Младеновски.
Тој не сакаш да прецизира кои ќе бидат нивните следни активности доколку не се исполнат нивните барања, но рече дека ќе продолжат и понатаму да бидат активни.
– Се надеваме на брзо и мирно решавање на политичката криза. Ќе продолжиме да бидеме активни, но во овој момент нема да откриеме што понатаму – рече Младеновски за време на блокадата на мостот Гоце Делчев.
