Британскиот весник „Телеграф“ објави репортажа по повод Денот на независноста на Република Македонија, насловена „25 значајни работи што не сте ги знаеле за Македонија“.
Охрид, Струга и Вевчани повторно се застапени на страниците на „Телеграф“, но овојпат поводот е честитката од уредниците на медиумот за Денот на независноста на Република Македонија.
Автор на репортажата на „Телеграф“ е Хју Морис, а во неа се користени материјали на Адријан Бриџ, кој ја посетил Македонија во јули годинава.
Македонија има бројни убавини, но само едно е под заштита на УНЕСКО како природно и културно наследство, а тоа е Охрид со езерото, појаснува авторот на репортажата.
„Трпејца е мало село на брегот од Охридското Езеро, познато како македонско Сен Тропе“, вели репортерот на „Телеграф“, Адријан Бриџ.
Тој во репортажата пишува и за јужниот дел од Охридското Езеро, каде се наоѓа манастирот „Св. Наум“ кој датира од 910 година, а чија убавина, како што забележал, „ја дополнуваат и пауните со своето пеење“.
Британскиот репортер во текот на својата посета на земјава бил и во Вевчани и за ова македонско село напишал: „Високо на ридовите во северниот дел од Охридското Езеро, селото е познато по своите извори, привлечно за уметниците, а познато и по тоа што веднаш по осамостојувањето на Македонија од Југославија објави независна Република Вевчани“.
Неодминлива за поетите, според авторот на статијата, е Струга, каде се одржуваат „Струшките вечери на поезијата“.
Во репортажата се спомнуваат и Мајка Тереза, опсерваторијата Кокино, Миленумскиот крст, статуата „Воин на коњ“, Тоше Проески, трите национални паркови, како и македонската кујна.