Албанија има уставна обврска да се грижи за сите наши сонародници кои живеат надвор од територијата на земјата. Не се работи за мешање во внатрешните работи на Македонија, туку за консултации со политичките лидери на Албанците од Македонија, вели албанскиот амбасадор, Фатос Река, во неделното интервју за „Радио Слободна Европа“.
– Оваа платформа на политичките партии на Албанците е составена од нив самите и за Република Албанија не е важно кој ќе биде во влада и како ќе се формираат коалициите. Тоа е внатрешна работа на политичките партии од Македонија, било да се од албанскиот етникум или од македонскиот етникум. Важно за Република Албанија е населението од албанскиот етникум, кое живее во Македонија, да ги има своите максимални права, за да живее рамноправно со другите етникуми, вклучувајќи го и македонскиот – вели Река.
Тој вели дека албанската влада не го става под знак прашалник политичкиот капацитет на албанските политички партии во Македонија туку дека тоа биле консултации за унифицирање на албанскиот фактор.
На прашањето зошто министерот за надворешни работи, Дитмир Бушати, го користи терминот „славомакедонци“, Река вели дека тој најверојатно го направил тоа за да направи разлика помеѓу македонските Албанци и словенските Македонци.
