Најмалку 60 проценти од човечките патогени заболувања се пренесуваат од луѓето на животните и обратно, истакна регионалниот претставник на Светската организација за здравствена заштита на животните, Никола Белев, на Регионалниот семинар за националните контакт-точки за ветеринарните препарати, што од денеска до 20 ноември се одржува во Охрид.
– Болестите, како африканската чума, чумата, синиот јазик, шапот, лигавката, туберкулозата, бруцелозата, се пренесуваат од животните на луѓето и обратно. Токму со тоа се занимаваме затоа што се страшни болести. На пример, беснилото кај животните е прашање за кое треба да се најде решение, односно вакцина и биопрепарати што ќе дејствуваат болеста да не се пренесува на луѓето. Од африканската чума угинаа илјадници животни. Затоа сме овде, да расправаме и да договараме како да се избориме со ваквите болести -истакна Белев.
Во организацијата на собирот е вклучена и Агенцијата за храна и ветеринарна заштита на Република Македонија.
Директорот на Агенцијата, Зоран Поповски, сопшти дека македонското законодавство во однос на ветеринарно-медицинските препарати е целосно усогласено со европската легислатива.
– Со таа цел и го организиравме собирот во Охрид, како придонес во унапредувањето на политиките и законодавството во однос на самите ветеринарно-медицински препарати. Со адекватна примена, би се подобрило здравјето на самите животни и со тоа и на луѓето, кои се консументи на производи од животинско потекло – рече Поповски.