Турската полиција рано утринава, во рација во Истанбул, уби две жени, кои, како што пренесуваат локалните медиуми, биле припаднички на милитантни ќелии.
Агенцијата „Доган“ наведува дека пресметката во која полесно се повредени четири лица се случила во европскиот дел на градот.
Во извештајот не е прецизирано на која организација ѝ припаѓале овие жени.
Агенцијата пренесува дека жените биле дел од ќелијата што се поврзува со мистериозниот бомбашки напад на станицата на истанбулското метро на 1 декември, кога беа ранети шест лица.
Ниту една група не ја презела одговорноста за тој напад, а се претпоставува дека мета на нападот било полициско возило кое се наоѓало во близина.
Денешниот судир избил кога милитантите пукале на полицајците при претресот.
