Првото издание на фестивалот за електронска музика „Кора“ ќе се одржи на 18 и 19 септември во Кучково, на околу 30 минути од Скопје. Организатор на дводневниот настан е екипата зад скопскиот клуб „Минус Еден“.
На фестивалот, кој ќе се одржува под отворено небо, ќе настапат околу 30 локални, регионални и интернационални артисти. Организаторите го најавуваат „Кора“ како отворен простор за современата електронска сцена, без строги жанровски ограничувања и со фокус на внимателно избрана програма и квалитетен звук.
Програмата ќе опфати сурово и хипнотичко техно, електро, необични синт-линии, прекршени ритми, експериментални форми и слоевити музички текстури.
Меѓу интернационалните артисти што ќе настапат се Matrixxman, Legowelt, Object Blue, Interstellar Funk и Adriana Lopez. Регионалната сцена ќе ја претставуваат Невена Јеремиќ, Little Lu, Sev-Dah и UnDoo.
Во програмата се вклучени и домашните артисти Стојче Цветановски, Херзел Ливе, Андреј Мицајков, Душко Јаневски, Васо, Нашасиа Киш, диџеј Чваре, Диа, Бодан Јамакоски, Ивана Драгшиќ, Мартина Пенева, Мартин Војдановски, Томи Бојаџи и други.
