Првиот круг од претседателските избори што се одржа вчера ја има најмалата разлика во гласови меѓу двајцата кандидати на последните пет круга претседателски избори, односно Стево Пендаровски освои само 4.606 гласови повеќе од Гордана Сиљановска – Давкова. Поради тоа, многу се мали и шансите за успешно предвидување на исходот од вториот круг, ако се обидуваме да правиме споредба со претходните избори.

Во претходните три циклуси на избори на претседател на државата како по правило кандидатот со повеќе гласови во првиот круг, победувал на изборите во вториот круг. На изборите во 2014 година, Ѓорге Иванов во првиот круг освои 123.278 гласови повеќе од својот ривал и актуелен претендент за функцијата шеф на државата, Стево Пендаровски, а потоа во вториот круг ја задржа големата предност и победи со 136.833 гласа разлика.

Слична беше и ситуацијата на изборите во 2009 година, кога со отприлика исти разлики, Иванов го победи противкандидатот Љубомир Фрчкоски и го освои првиот претседателски кандидат.

Убедливо водство на конечниот победник на претседателските избори и во првиот и во вториот круг имаше на гласањето во 2004 година, кога Бранко Црвенковски на својот противник Сашко Кедев му водеше со 76.215 гласа во првиот круг и со 221.138 гласа во вториот, што е најголемата разлика во изборните циклуси што ги разгледуваме.

Но не беше така на претседателските избори во 1999 година, кога се случи најголемото изненадување. Имено, во првиот круг водеше Тито Петковски, кандидат на СДСМ, со 343.606 гласа наспроти Борис Трајковски, со 219.098 гласа, односно водството изнесуваше 124.508 гласа. Но работите целосно се сменија во вториот круг, кога Трајковски ја однесе победата со 591.972 гласа, односно 77.373 гласови повеќе од противкандидатот.