Историското градско собрание на Бордо во Франција е запалено на денот на најголемиот протест досега против обидот на францускиот претседател Емануел Макрон да ги спроведе реформите за зголемување на старосната граница за пензионирање, пренесе Индепендент.
Демонстрантите собрани пред Палатата Рохан навиваа додека дел од зградата се запали, што е еден од бројните инциденти на вандализам и насилство кои вчера се случуваа низ целата земја.
Големите протести ја загрозуваат можноста за посета на британскиот крал Чарлс III на Франција, што требаше да биде негова прва официјална посета во странство откако стана крал.
Надоврзувајќи се на силниот одѕив на протестите во четвртокот, синдикатите повикаа на нови протести следниот вторник, кога ќе биде втор ден од посетата на британскиот монарх, кога тој треба да го посети Бордо.
Видеата што кружат на социјалните мрежи покажаа огромни пламени јазици кои ги зафатија тешките дрвени влезни врати на градското собрание.
Изградбата на градското собрание беше завршена до 1784 година, само неколку години пред Француската револуција. Зградата е истакнат пример на француската барокна архитектура во текот на 18 век.
Градското собрание е само еден од случаите кога гневот на обичните демонстранти е силно изразен. На најголемиот штрајк во Франција против пензиските реформи учествуваа милион луѓе, со 119.000 луѓе што маршираа низ улиците на Париз во четвртокот, според податоците на француското Министерство за внатрешни работи.
Околу 80 лица беа уапсени од полицијата, а 123 полицајци и жандарми беа повредени поради широко распространетото насилство и немири, изјави во четвртокот вечерта францускиот министер за внатрешни работи Жералд Дарманин.
Тој рече дека 12.000 безбедносни сили биле распоредени во четвртокот, а 5.000 од нив биле стационирани во Париз.
Демонстрациите се случуваат против предложената легислатива на Макрон за зголемување на старосната граница за пензионирање од 62 на 64 години. Претседателот тврди дека тоа е неопходно за да се одржи стабилноста на системот за пензионирање.
Во Париз избија жестоки судири меѓу полицијата и групи поединци облечени во црно и со маски. Овие групи нападнаа неколку објекти, вклучувајќи ресторани за брза храна, супермаркет и банка. Демонстрантите фрлаа молотови коктели, предмети и огномети кон полицијата, која одговори со напад врз нив и употреба на солзавец за да ја растера толпата.
На видео снимките се прикажани испарувања од солзавец кај Плас де л’Опера, каде што се собраа демонстрантите. Вознемирувачка слика од протестите покажува како онесвестен полицаец во Париз е спасен откако тој и другите полицајци биле нападнати со огномет и други проектили.
