Илјадници демонстранти синоќа се собраа во Братислава, главниот град на Словачка на протест против политиките на популистичкиот премиер Роберт Фицо. Демонстрациите се случија на 35-годишнината од почетокот на Кадифената револуција која стави крај на децениското комунистичко владеење во поранешна Чехословачка, јави „Јуроњуз“.
Протестот ја обедини опозицијата, вклучително и либералната Прогресивна Словачка, про-бизнис партијата Слобода и солидарност и конзервативните демохристијани – сите партии велат дека Фицо е закана за демократијата.
„Словачка е и ќе биде дел од западната цивилизација“, порача од протестот конзервативниот политички ветеран Франтишек Миклошко, кој беше еден од словачките водачи во 1989 година.
Лидерот на партијата Слобода и солидарност, Бранислав Гролинг рече дека Фицо ја води земјата кон „авторитарен режим како во Русија и комунистичка Кина“.
Михаил Шимечка, лидерот на Прогресивна Словачка, која во моментов е најпопуларната партија во земјата, рече дека опозицијата ќе стори сè што е потребно за да ги заштити слободата и демократијата.
„Словачка е и ќе биде нација на слободни луѓе. И слободните луѓе нема да молчат“, рече тој.
Фицо и неговата левичарска партија Смер победија на минатогодишните парламентарни избори со проруска и антиамериканска платформа.
Неговата влада го истурка планот за ремонт на јавниот радиодифузен сервис – потег што критичарите велат дека ќе ѝ даде на владата целосна контрола врз јавната телевизија и радиото.
Ова, заедно со измените на казнетиот законик и елиминирањето на специјалниот обвинител против корупција, ги загрижи Словаците дека Фицо ќе ја води земјата по поавтократски пат, следејќи ја насоката на Унгарија под водство на популистот Виктор Орбан.
Фицо ја прекина воената помош на неговата земја за Украина, се противи на санкциите на ЕУ кон Русија, сака да ја блокира Украина да се приклучи на НАТО и планира патување во Русија, пишува „Јуроњуз“.
