Мал број активисти половина час вечерва ја блокираа улицата пред објектот на Владата, на протест организиран на иницијатива на братот на починатиот Мартин Нешкоски, објави „Нова ТВ“.
Велат дека причините за протест се многу, но појдовна точка е расветлување на смртта на младиот Мартин Нешковски, враќање на институциите на државата и оставка од целокупната Влада.
– Денешниот протест е поради четири години молк, заташкување и уништување на сè што е народно. Народот веќе не може да ја издржи стегата на оваа фамилија, институциите ги зедоа под своја команда, сè е во корист на една фамилија, наместо на народот и тоа е главната каписла. Убиството на Мартин беше на плоштад пред илјадници сведоци, го заташкаа до максимум и не е само тоа, колку има што патат од истиот проблем. Вратите на институциите ги научивме сите на памет, гледаме како во сопствена држава се бориме за права кои треба да ги имаме. Не ги повикавме политичките партии зошто не планираме да нè манипулира никој – изјави Александар Нешкоски.
Нешкоски вели дека протестот се случува денеска, токму поради политичката ситуација во која се наоѓа земјата. Тој вели дека зависно од постапките на власта, собирите ќе продолжат, а за нивниот интензитет активистите дополнително ќе одлучуваат.
