fbpx

Протест пред Уставен суд: Судиите послушници на власта да си дадат оставки

-

Стотина граѓани денеска повторно протестираа пред Уставниот суд и бараа оставка од судиите кои одлучија да ја разгледуваат иницијативата за уставност на законот со кој се предвидува лица гонети или осудувани за изборен криминал да не можат да бидат помилувани.

Граѓаните извикуваа „Оставка“, „Збогум криминална бандо“, „Но пасаран“, и „И да го одбраниме Уставот од уставните судии“.

Уранија Пировска од Хелсиншкиот комитет рече дека Уставниот суд е конституиран за да го штити Уставот, да ги штити и правата на граѓаните, но тој откако е изгласан сегашниот состав на судии, го прави спротивното.

Таа рече дека овие судии ја одбиле иницијативата за законот за лустрација, за законот за абортус и многу други неуставни закони.

– Овој состав на судии работи директно под палката на злосторничкото здружување. Јас ќе протестирам секој ден се додека овие судии не си поднесат оставка и се додека не ги ослободиме институциите. Нема правда, нема мир – рече Пировска.

Пред граѓаните зборуваше и граѓанскиот активист Славчо Димитров кој истакна дека има разлика меѓу вчерашните и денешните протести. Димитров додаде дека, денеска протестот е за слобода, а вчера бил за крстови, орли и политички партии.

– Ние живееме во држава во која царот Николај и неговите послушници ни кажуваат што е вистина, а што не. Ние живееме во држава во која владеењето на правото е владеење на царот Николај. Ние живееме во држава во која власта го сотре образованието. Ние живееме во тоталитаризам. Уставните судии се бираат во Собранието, а Собранието е конститиурано на нелегални избори, што значи е нелегитимно зашто има нелегитмно мнозинство, а со тоа и уставните судии се нелегитимни. Сакате да ја штитите Јанкулоска која „за уши ќе ги носи Циганите да гласаат“, е па ние ќе ви порачаме дека за уши ќе ве фатиме и на клоци ќе ве исфрлиме. Ова не е Уставен суд ова е „Усран суд“ и нема да ви кажам сиктер, ќе ви кажам „Мрш бандо криминална“ – рече Димитров.

Пред насобраните беше прочитана и „Ода за царот Николај“, а се обратија и неколку граѓани кои порачаа дека се незадоволни од оваа власт и дека им е доста од притисоци и уцени, како и дека нема да престанат да протестираат се додека сите не си поднесат оставки.

На денешниот протест се пуштаа неколку „бомби“ кои ги објавуваше лидерот на опозицијата, Зоран Заев.

Граѓаните ги слушаа гласовите на поранешниот шеф на УБК, Сашо Мијалков како договара гласање на судии во Врховниот суд и на поранешната министерка за внатрешни работи Гордана Јанкулоска која кажува, како „за уши ќе ги носат Циганите на гласање“.

Граѓаните фрлија и неколку јајца врз објектот на судот, иако од фасадата се уште не беа исчистени јајцата од претходните протести.

Овој протест е четврти по ред, а го организира граѓанската платформа „Ајде“.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Млади иноватори изработија мобилна апликација за помош на дијабетичари

Ѓорѓина Ристовска и Марио Мијатовиќ се млади иноватори кои ја креираа апликацијата ДИА, како асистент на лицата со дијабетес за менаџирање на оваа состојба. Инспирирани од желбата да помогнат...