Тетовските гимназијалци од руралните општини протестираа пред зградата на Општина Тетово, револтирани што властите и по три недели не им обезбедува бесплатен превоз од нивните домови до училиштетото. Велат дека мораат сами да го плаќаат превозот, а некои ученици со финансиски тешкотии сè уште не тргнале на училиште.
– Јас сум од Челопек. Плаќам до Тетово 40 денари и назад уште 40 денари. Никој не ме прашува дали имам или немам, некои немаат, па не одат еден месец на школо – изјави еден ученик од тетовската гимназија.
По протестот, учениците влегоа во една од просториите на општинската зграда. Остварија средба со преставници на општинскиот сектор за образование. По завршувањето на средбата, која беше затворена за јавноста, од секторот за образование на Општина Тетово ни изјавија дека решавањето на проблемот со превозот на тетовските средношколци зависи од комисијата за јавни набавки, која одлучува по жалбата на превозниците, за поништениот тендер за превозот на ученици. Комисијата, според секторот, на поднесената жалба треба да одлучи денеска или најдоцна до утре.
