Обидот за отповикување на јужнокорејскиот претседател Јун Сук Јеол поради прогласувањето на воена состојба во земјата, пропадна денеска откако членовите на неговата партија го бојкотираа гласањето, јавува Гардијан.
Нивното напуштање на седницата значеше дека националното собрание го нема потребниот број на гласови – 200 – за да го започне процесот на импичмент на Јеол.
„Со вкупно 195 гласови, бројот на членови кои гласаа не го достигна потребното двотретинско мнозинство од вкупниот број членови“, рече претседателот на националното собрание, Ву Вон-шик.
Кога започнала пленарната седница, некои членови на владејачката Партија на народната моќ ја напуштиле салата. Пратеници од опозицијата ги повикувале со зборовите „Предавници, вратете се“.
Според извештаи на локалните медиуми, тројца пратеници од владејачката партија се вратиле за да гласаат.
Опозициската Демократска партија најави дека на 11 декември ќе предложи нов закон за импичмент на јужнокорејскиот претседател.
Шефот на владејачката партија Хан Донг-Хун, пак, рече дека неговата партија и претседателот Јун Сук Јеол ќе работат заедно за да најдат начин тој по уреден пат да ја напушти функцијата, нешто на што се согласил и претседателот.
Декларацијата за воена состојба на Јун Сук Јеол која траеше шест часа, пред да биде официјално отфрлена од пратениците, наиде на широка осуда низ јужнокорејскиот политички спектар и предизвика масовни протести во Сеул и други јужнокорејски градови.
