Основното јавно обвинителство Скопје повело истрага против надзорник во затворот „Идризово“, кај кого при претрес била пронајдена марихуана, соопштија денеска од јавното обвинителство.

„На 28 јануари 2016 година, при редовна контрола и личен претрес на лицето врaботено како надзорник во Казнено поправната установа „Идризово“, во неговите лични работи пронајдено е топчесто пакување налепено со лелива лента за кое при вештачењето е утврдено дека е марихуана. При извршениот претрес во домот на осомничениот, покрај количество марихуана, пронајдени се и девет парчиња муниција. Надлежниот јавен обвинител од Основното јавно обвинителство Скопје издаде наредба за поведување истражна постапка“, стои во соопштенето од јавното обвинителство.

На предлог на обвинителот, судија на претходна постапка на осомничениот му одредил мерка притвор од 30 дена.

Според обвинителството, надзорникот се товари за неовластено производство и пуштање во промет на наркотични дроги, психотропни супстанци и прекурсори и за недозволено изработување, држење и тргување со оружје или распрскувачки материи.

Од Министерството за внатрешни работи (МВР) соопштуваат дека осомничениот надзорник Х.Х.(38) во текот на јануари набавил поголемо количество марихуана, која ја препакувал во својот дом и потоа им ја продавал на лица во затворот. При претресот на неговиот дом во населбата Ченто, полицијата пронашла пиштол, кој надзорникот неовластено го поседувал, и две рамки со куршуми.