Амбасадата на Црна Гора во соработка со невладината „Љубав“ и Спомен-куќата на Мајка Тереза, вчера организираше промоција на книгата посветена на добитничката на Нобелова награда за мир, родена скопјанка, позната како светицата од Калкута, од авторот Весна Мартиновиќ.
Книгата насловена „Никој не ме праша за име“ ја промовираше новинарката Јасмина Миронски, автор на книга и на монографија за Мајка Тереза, која истакна дека книгата со необичен наслов на еден успешен начин преку белетристичко-реалистични елементи и специфична компилација на личните размислувања на авторот и на фактите говори за оваа исклучителна жена.
Мартиновиќ доаѓа од Подгорица и со еден нов необичен и сентиментален пристап зборува за Мајка Тереза, за која и многу се пишувало и многу се зборувало како една од веројатно најлуцидните ликови на минатиот век, една од најенергичните, најпосветените и, секако, најхумана од хуманите.
