Претставниците на „Професорски пленум“ нема да учествуваат на дебатата што Министерството за образование ја организира денеска во хотелот „Александар палас“. Тие на својот фејсбук-профил објавија соопштение во кое се вели дека „Професорски пленум“, составен од речиси петстотина професори од различни универзитети, не сака да му даде легитимитет на овој настан, чија единствена цел е да креира привид на транспарентност и за партиципативност во донесувањето октроирани закони.
„Сметаме дека со оваа постапка се прави обид вонинституционално да се „коригира“ и супституира Собранието на Македонија како законодавно тело, што е спротивно на уставното начело за поделба на власта и на владеење на правото, особено во овој момент откако измените на законот ја поминаа првата фаза во Собранието и тие се речиси едногласно изгласани. „Професорски пленум“ и натаму цврсто стои зад барањето за повлекување на законските измени“, стои во соопштението.