Хотел со површина од близу 6.000 квадратни метри ќе се гради во Кочани, откако денеска на електронска аукција беше купен плац по цена од 313 денари за еден квадратен метар. Плацот за хотелот е еден од 49-те парцели државно земјиште понудени за продажба од Општината Кочани. Денеска беа продадени 31 плац, при што Општината треба да инкасира 95.500 евра.
Општината соопшти дека се продадени и 21 парцела за викенд-куќи во туристичката населба Пониква и при тоа била постигната различна цена од 71 денар до 550 денари од еден квадратен метар.
На електронското наддавање денеска беа продадени и седум локации за лесна индустрија и за мало стопанство, како и шест парцели за индивидуално домување. Парите треба да бидат уплатени до 24 декември, по што Општината планира уште една продажба, како што изјави градоначалникот Ратко Димитровски, поради зголемениот интерес за градежни парцели.
