Сите домашни летови во САД беа приземјени неколку часа поради дефект со системот за контрола на летот, јавија светските медиуми.
Американската Федерална управа за авијација соопшти дека настанал проблем со системот што ги предупредува пилотите за потенцијални опасности за време на летовите, критичен систем за воздухопловната безбедност.
„Гардијан“ јави дека биле одложени повеќе од 2.500 летови во, кон или надвор од САД според интернет-страницата „FlightAware“.
Според Би-би-си, за случајот бил информиран и американскиот претседател Џо Бајден, а Белата куќа соопшти дека досега нема докази за сајбер напад. Бајден повика на целосна истрага за причините за дефектот.
Најголемиот превозник „Американ ерлајнс“ соопшти дека прекинот ги погодил сите летови, вклучително и сите превозници. „Јунајтед ерлајнс“, пак, информираше дека ги одложува сите домашни летови додека не добијат повеќе информации од управата за авијација.
По неколку часа, управата ја укина својата наредба за запирање на сите полетувања за домашни летови, откако го обнови системот што им обезбедува на пилотите безбедносни известувања пред летот.