Основното јавно обвинителство Велес поведе истражна постапка против тројца осомничени – двајца од Прилеп и едно лице од село Ореше – поради предизвикување пожар со кој била опожарена викенд куќа во село Капиново, општина Чашка.
Настанот се случил на 10 мај кога осомничените со патничко возило со прилепски таблички дошле до викенд куќата, насилно влегле во објектот и намерно предизвикале пожар со запалива течност. Во моментот на инцидентот, сопствениците не биле присутни, но објектот бил целосно зафатен од пожарот и причинета е значителна материјална штета. Повредени лица нема.
Пожарот бил изгаснат од Територијалната противпожарна единица Велес, а по спроведена истрага на СВР Велес во координација со криминалистичките служби од БЈБ и ОВР Прилеп, било утврдено дека осомничените се Ѓ.П. (56) од Ореше, С.М. (40) и Д.Д. (37), двајцата од Прилеп.
Според МВР, двајца од осомничените, Ѓ.П. и Д.Д., се уапсени на 16 мај и се задржани во полициска станица, додека се преземаат мерки за пронаоѓање и приведување на С.М., кој е во бегство.
Јавниот обвинител до надлежниот суд доставил предлог за определување мерка притвор за сите тројца. За двајца од нив, притворот веднаш стапува на сила, додека за третиот осомничен ќе се примени по неговото пронаоѓање.
