Македонскиот институт за медиуми и Македонската радиотелевизија подготвија прирачник за новинари „Етички и професионални принципи на МРТ за медиумското покривање изборни процеси“, кој содржи 10 принципи за непристрасно и независно информирање.
Следната недела, претставници од јавниот сервис на Британија, „Би-Би-Си“, ќе ги учат новинарите од МРТ како да известуваат балансирано за време на изборите.
Британскиот амбасадор, Чарлс Гарет, вели дека овој прирачник дава насоки за професионалност, урамнотеженост и за избалансираност во известувањето, што е суштинско за спроведување слободни и фер избори.
– Изборите што претстојат оваа година, ако се спроведат правилно, ќе бидат значаен чекор за излез на оваа земја од хроничната политичка криза – рече Гарет.
Британскиот амбасадор додаде дека јавниот сервис мора да им служи на сите граѓани, не само на некои, овозможувајќи висок квалитет, баланс и непристраснот при медиумското покривање за време на изборите.
Директорот на МРТВ, Марјан Цветковски, смета дека не треба да се има илузија дека овој документ ќе ги реши сите проблеми во информативната програма, но, според него, тој е добра рамка.
– Јавниот радиодифузен сервис ја презема обврската да биде урамнотежен и непристрасен во известувањето за изборите и да не дискриминира ниту една политичка партија, коалиција или независен кандидат. На сите партии и кандидати што ќе учествуваат на изборите ќе им биде обезбеден правичен пристап. Ова е основен принцип за спроведување фер и транспарентни избори. МРТВ ќе ги покрива изборите на точен и прецизен начин, сите информации ќе бидат ставани во соодветен и релевантен контекст. Јавниот сервис ќе обезбеди целосно разграничување помеѓу државните и партиските политики – рече Цветковски.
Документот е дел од проектот „Непристрасноста и независноста на медиумите како услов за слободен и фер изборен процес“, кој се спроведува од страна на „Би-Би-Си медија акшн“ во партнерство со Македонската радио-телевизија, а со поддршка од Македонскиот институт за медиуми.
Проектот е поддржан од британската амбасада во Скопје.
