Полициски екипи на Секторот за внатрешни работи Тетово, ноќеска извршиле претрес во домот и во помошни простории, сопственост на З.Р. (73) во Шипковица, каде пронашле насади, најверојанто со канабис сатива, кои, според сомневањата, ги одгледувал синот на сопственикот, 42-годишниот Х.Р., кој е во бегство.

Според полицијата, при претресот на балкон на третиот кат од куќата, што го користел Х.Р., биле пронајдени 150 пластични чаши од јогурт, наполнети со ситна земја, а во пет од нив имало изникнати непознати зелени растенија со височина од околу три сантиметри. На балконот била пронајдена и пластична кутија со семенски материјал.

Во помошниот објект, пак, полицијата пронашла 46 вреќи со земја во кои имало „51 зелено растение со височина меѓу 10 и 15 сантиметри за кое постои сомнеж дека е канабис сатива (марихуана)“.

Пронајдените предмети и растенијата се одземени од полицијата и предадени на понатамошно вештачење.

Осомничениот Х.Р., пак, вчеравечер бил пријавен дека во алкохолизирана состојба извршил семејно насилство врз своите родители и ја запалил нивната плевна со добиточна храна.