Преживеани патници кои сведочат за крвавиот напад на аеродромот „Ататурк“ во кој загинаа најмалку 36 лица, а повредени се повеќе од 147, велат дека на сите страни виделе безживотни тела на убиени луѓе.
Пред да се случи експлозијата, еден од напаѓачите почнал да пука додека се приближувал кон терминалот, изјавил еден сведок за „Ројтерс“.
„Пукаше на сè пред себе. Беше облечен во црно. Лицето не му беше маскирано. Бев на 50 метри од него,“ изјавил Пол Рос од Јужна Африка.
Патничката Офтах Мухамед Абдулах за АФП изјавила дека еден од напаѓачите имал на себе шамија и куса јакна под кој го сокрил оружјето.
– Го извади оружјето и почна да пука во луѓето. Одеше како пророк – изјавила таа.
Турскиот премиер Бинали Јилдирим синоќа ги посетил ранетите во болница, а на роднините на загинатите им изразил сочувство. Тој пристигнал од Анкара само неколку часа по трите синхронизирани експлозии на аеродромот „Ататурк“.
Нападите се припишуваат на Исламската држава или курдските бунтовници.
