Во Охрид денеска ќе биде промовиран нов туристички производ, „Блаканска пешачка авантура“ (Balkan hiking adventure), чија цел е збогатување на понудата за активен одмор во регионот.
Креацијата jа помогнаа германското Друштво за меѓународна соработка – ГИЗ, преку Сојузното Министерство за меѓународна соработка и развој на Германија.
Целта е да се поттикне економскиот развој во пограничните области на полошкиот, југозападниот и на пелагонискиот регион.
Производот вклучува водич, шест мапи за патеките поделени по планински масиви, телефонска апликација за платформите „андроид“ и „иос“, како и веб-страница.
Неговите креатори истакнуваат дека овој производ се состои од 37 креирани и обележани планинарски патеки на Шар Планина, Бистра, Дешат, Крчин, Стогово, Јаблница, Галичица и на Баба, од кои осум патеки се транснационални.
Со погранично поврзување преку зелени премини, производот станува регионален и овозможува при една посета да се доживеат три земји: Македонија, Косово и Албанија.
Во производот се вклучени и сместувачки и угостителски објекти покрај патеките, како и места од интерес, поврзани со богатото културно и природно наследство на регионот.
За да се подобри квалитетот на понудените услуги, ГИЗ поддржа реновирање и опремување на осум селектирани објекти, како и обуки за понудувачите на туристички услуги.
Исто така, 15 млади луѓе од поширокиот регион се поддржаа со обука за професионални водичи во планина по меѓународниот стандард ИМЛ.