На Академската сцена на Факултетот за драмски уметности во Скопје во четврток (5 декември) со почеток во 20 часот ќе биде изведена претставата „Види, летам!“, во чест на 30-годишнината од отворањето на Претставништвото на УНХЦР, Агенцијата на ОН за бегалци во Северна Македонија.
Влезот за претставата е слободен.
„Види, летам!“ е проект на Вондерленд театар од Скопје, во соработка со Младинскиот образовен форум (МОФ) и УНХЦР.
Станува збор за претстава која е правена по вистински приказни на лица бегалци, баратели на азил и лица без државјанство. Овие луѓе на посебни работилници водени од тимот на претставата, храбро ги споделиле своите животни искуства со актерите, авторот и режисерот. Нивните идентитети во текот на целиот процес остануваат заштитени и анонимни.
Раскажаните приказни авторката на претставата Ана Ристовска Трпеноска ги преточи во емотивен текст кој говори за трауматичните настани низ кои овие лица поминувале, но и за нивните детства, соништа, емотивни потреби, љубовни искуства и потребата да бидат дел од заедницата која често ги отфрла.
Проектот е во режија на Ивана Ангеловска, а под креативно водство на уметничкиот координатор Нела Витошевиќ. Во претставата играат актерите Никола Настоски, Исмет Шабановиќ, Ана Димитрова, Леонардо Лазов и Сара Спиркоска.
Вондерленд театар е независна театарска продукција со седиште во Скопје. Главните цели на продукцијата, како што велат од таму, се кревање на свеста за потребата од културна и општествена промена, како и внесување свежина на независната уметничка сцена, експериментирајќи со алтернативни места и виртуелен простор.
