Инспекција на силите за безбедност на Синајскиот Полуостров, каде тие се борат со борци кои ја поддржуваат групата Исламска држава, денеска изврши египетскиот претседател Абдел Фатах ал Сиси.
Сиси се сретна со претставници на армијата и на полицијата. Тој го посети главниот штаб на војските во Северен Синај и беше запознат со операцијата што се води против џихадистите.
Силите за безбедност во Синај се подложни на напади од џихадистите, откако во Египет во 2011 година беше соборен режимот на Хосни Мубарак. Екстремистите ги засилија своите вооружени активности откако армија во 2013 година го отстрани од власта претседателот Мохамед Морси.
Неделава борците, поврзани со Исламска држава, извршија координирани напади врз силите за безбедност во Синај.
Според армијата во нападите и борбите што следеле загинале 17 војници и 100 екстремисти.
