Грција, Италија, Германија и Велика Британија се само некои од европските земји кои бележат пораст на бројот на ковид случаи. Како што оцени Светската здравствена организација (СЗО) неодамна, „бруталното“ укинување на ограничувањата е главната причина зошто неколку европски земји регистрираат нагло зголемување на случаите. Пораст на случаите има и во Кина, а Шангај е во локдаун додека не се прегледаат резултатите од тестовите на сите 26 милиони жители. Кај нас, пак, ситуацијата засега е стабилна, иако епидемиолозите предупредуваат дека мора да се внимава.
Епидемиологот д-р Александар Стојанов смета дека сега е доцна да се воведуваат мерки или да се забрануваат собири.
„Кога мерката за негрупирање беше на сила не се почитуваше, па затоа не можеме да очекуваме да се почитува ако повторно се врати на сила. Еднаш кога ќе се испушти работата, тешко се враќа на старо. На властите во европските земји сега примарно им е колку е оптеретен здравствениот систем. Имаат задоволителна бројка на вакцинирани, па затоа е и опуштено секојдневието. Швајцарија вирусот го сметаат за грип, а Шпанија ја прогласи како ендемска болест која се јавува на одредено време и толку. На сите им е преку глава од рестрикции, карантини и тешко може да се вратат да се вратат пак тие мерки“, смета д-р Стојанов.
Кај нас, според него, проблем е што имаме мал број на вакцинирани лица, односно со трета доза е вакцинирано само 7 отсто од населението.
„Американската агенција за храна и лекови препорача чертврта доза, за лицата над педесетгодишна возраст и за хронично болните. А кај нас трета не може да се даде. Треба да обрнеме внимание на тоа да се вакцинираат луѓето. Караванот за трета доза заврши, две недели траеше. Мислам дека тоа треба да продолжи. Треба да се оди во селата и на лице место и да ги вакцинираат луѓето бидејќи тие во амбуланта нема да дојдат да се вакцинираат“, потенцира д-р Стојанов.
Тој вели дека сѐ што било предвидено за овој вирус во корелација со другите корони, во пракса се покажало дека не е така.
„Ни во зима ни во лето не застана оваа болест. Не е сезонска како што беше со некои други. Караванот за трета доза заврши, две недели траеше. Мислам дека тоа треба да продолжи ако имаат добри резултати. Да се оди во село на лице место и да ги вакцинираат“, вели доктор Стојанов.
Инаку, Комисијата за заразни болести денеска информираше дека на редовниот состанок донеле препораки за намалување на рестриктивните мерки и се согласиле да препорачаат укинување на задолжителното носење на маските во затворен простор. Исклучок од оваа мерка се здравствените установи, домовите кои згрижуваат постари лица, аптеките и јавниот превоз. Препораките треба да се преточат во одлуки кои ќе се најдат на владина седница во претстојниот период.
