Корона кризата предизвика лоши оценки од раководителите на деловните субјекти во преработувачката индустрија за состојбата во која се наоѓала оваа стопанска гранка во текот на минатиот месец. Индикаторот на доверба во преработувачката индустрија се намалил за три процентни поени во однос на април 2020 година и изнесува 13, а во однос на мај 2019 година е намален за 8 процентни поени, покажуваат податоците на Државниот завод за статистика.
Состојбата на обезбеденоста на производството со порачки во мај 2020 година, во однос на април 2020 година, е понеповолна, очекувањата за обемот на производството во наредните три месеци се понеповолни во однос на претходниот месец, а залихите на готовите производи се намалени.
Оценката за економската состојба на деловните субјекти во мај 2020 година е понеповолна во однос на претходниот месец, а понеповолна и во однос на мај 2019 година. Раководителите на деловните субјекти од преработувачката индустрија очекуваат бројот на вработените да се намалува.
Просечното искористување на капацитетите на деловните субјекти во мај 2020 година изнесува 65,4 отсто од нормалното искористување.
Најголемо влијание врз ограничувањето на обемот на производството имаат следните фактори: недоволната странска побарувачка со 21,3 отсто, недостигот на квалификувана работна сила со 18,4 отсто, неизвесното економско опкружување со 14,6 отсто и недоволната домашна побарувачка со 12,7 отсто.
