Премиерот Никола Груевски заедно со владина делегација, во чиј состав се вицепремиерот задолжен за економски прашања, Владимир Пешевски, министерот за надворешни работи, Никола Попоски, и заменик-министерот за економија, Христијан Делев, се во неколкудневна посета на Народна Република Кина.
Претседателот на македонската влада ќе учествува на 4. Самит на шефови на влади на земјите на Централно-источна Европа и НР Кина (16+1) и 5. Економско-трговски форум во Суџоу, кој ќе се отвори денеска, а на кој се очекува да присуствуваат повеќе од 1.000 претставници од бизнис-секторите на 16-те земји од државите од ЦИЕ и од Кина.
Самитот ќе го отвори премиерот на НР Кина, Ли Кечианг, а на него освен од Македонија, ќе учествуваат делегации од Естонија, Унгарија, Латвија, Литванија, Чешка, Полска, Романија, Словачка, Словенија, Хрватска, Србија, Црна Гора, Босна и Херцеговина и од Албанија.
Иницијативата за самитите произлезена од Кина, која потекнува уште од 2012 година, во основа се состои од волјата за соработка, вложување во повеќе конкретни инфраструктурни проекти и за забрзан економски развој.
Во рамките на посетата, планирана е и средба на премиерот Груевски со претседателот на НР Кина, Си Џипинг, како и бизнис-форум во Пекинг каде ќе бидат претставени можностите за инвестирање во Македонија и потенцијалите со кои располага Македонија, како држава со поволна бизнис-клима.
