Владина делегација на чело со премиерот Никола Груевски од денеска е во посета на Саудиска Арабија, пренесуваат медиумите.
Владината делегација, покрај премиерот, ја сочинуваат вицепремиерот и министер за финансии Зоран Ставрески, министерот без ресор задолжен за привлекување странски инвестиции, Висар Фида, и заменик-министерот за економија, Христијан Делев, кои, како што соопштиле од владината служба за односи со јавноста, ќе престојуваат во политичко-економска посета на Кралството.
За време на посетата, во главниот град Ријад, предвидено е премиерот Груевски да оствари средба со политичкиот естаблишмент на Саудиска Арабија, односно со принцот Арабија Салман бин Абдулазиз ал-Сауд, кој ги извршува и премиерските должности на државата, потоа со директорот на Саудискиот фонд за развој, Јусуф бин Ибрахим ал-Басам, и со генералниот секретар на Заливскиот совет за соработка, Абдул Латиф бин Рашид ал-Зајани.
За време на престојот, ќе бидат организирани и бизнис-форуми на кои ќе бидат претставени можностите за инвестирање во Македонија и за развивање на економската соработка.