Премиерот Никола Груевски, вчера учествуваше на самитот „Партнерство 2015“, кој се одржа во градот Џајпур, Република Индија.
Меѓународниот економски самит „Партнерство 2015“, чија главна тема е продлабочување на економската соработка и остварување партнерства за нови релации, се одржува во организација на Конфедерацијата на индиската индустрија, која е најголемата стопанска комора што ги обединува најголемите компании во Индија, владата на индиската држава Раџастан, како и индиското Министерство за економија и промоција. Овој самит се одржува од 1995 година, а оваа година учествуваат економски делегации од вкупно 51 држава, како и претставници на меѓународни компании.
На отворањето на самитот, свое обраќање имаше претседателот на македонската Влада, Никола Груевски, кој се задржа на пријателските односи со Република Индија, како и на потенцијалите за соработка, особено во сферата на економијата како поле на заеднички интерес.