Преку подкастот „Јустинијан збори“ студентите ќе дебатираат за важни прашања

Студенти од Правниот факултет „Јустинијан Први“ во Скопје ги започнаа своите активности со првиот подкаст „Јустинијан збори“. Посочуваат дека ваков подкаст освен на Правниот, треба да има и на останатите факултети.

„Со овој подкаст сакаме да имаме едно наше место, еден вид на платформа каде наши другар/ки, студент/ки професор/ки и други релевантни субјекти ќе можат отворено да разговараат за своите мислења и ставови, дали за политика, дали за право“ – вели Димитар Тромбевски, студент на Правен факултет и еден од водителите во првата епизода на „Јустинијан збори“.

Преку подкастот како нетрадиционален начин на комуникација и информирање сметаат дека на еден нов и свеж начин ќе успеат да им ги пренесат информациите на студентите дома, поради околностите со корона кризата.

Во однос на името „Јустинијан збори“ велат дека е еден вид реакција.

„Името е последица на фактот што нашиот факултет многу често се наоѓа во позиција да не коментира збиднувања и настани што се случуваат и во државата и во странство. Вклучително тоа се гледа и на бројот на научните трудови што ги публикуваат нашите професори“ – додава Никола Донев, студент на правни студии на Правен Факултет.

Со ваков виртуелен начин на онлајн комуникација веруваат дека студентите ќе можат слободно да се изразат и да коментираат за настани во државата и светот што нив ги засегаат, особено од аспект на Западен Балкан.

Во првата епизода студентите зборуваа за самиот концепт на подкастот, а потоа дебатираа за изборите во САД. Во емисијата учествуваше и претседателот на Универзитетското студентско собрание, Борјан Ефтимов, кој исто така се надоврза во разговорот за изборната кампања во САД.

Најавија слушателите и гледателите да очекуваат нова емисија секоја среда, а нивните известувања за активности да ги следат на социјалните мрежи.