Пред состанокот меѓу Србија и Косово што ќе се одржи на 18 март во Охрид, највисоките официјални претставници излегоа со изјави во врска со очекувањата од овој важен настан. Косовскиот премиер Албин Курти денеска повтори дека е подготвен да го потпише европскиот предлог за нормализација на односите меѓу Косово и Србија, јавува Радио-телевизија Косово.
Курти вели дека било штета што договорот не бил потпишан претходно на 27 февруари.
„Ги продолжуваме подготовките за состанокот на 18 март, кој ќе биде одржан во Охрид, Северна Македонија, потребно е да видиме како да се усогласиме со европскиот предлог и да приложиме вистински план за имплементација којшто треба да се карактеризира со сеопфатност и ефикасност“, изјави премиерот Курти.
За тоа што досега не е потпишан договорот што содржи пет реченици, преамбула и 10 точки, премиерот Курти рече дека одговорот треба да се бара од другата страна.
Српската премиерка Ана Брнабиќ на затворањето на бизнис форумот во Копаоник денеска рече секој ден кој Србија го минува на европскиот пат ја прави посилна и подобра и дека стратешки приоритет на Србија е членството во ЕУ и за нив нема дилема по ова прашање.
„За нас се важни европските интеграции и тоа хамлетовско прашање не треба да биде дилема за нас“, изјави Брнабиќ, пренесува Радио-телевизија Србија.
Таа додаде дека од 2000 година до денес, 70 отсто од целокупните инвестиции во Србија дошле од земјите во Европската Унија, додека 65 отсто од српскиот извоз оди во земјите-членки на ЕУ.
