Пратеникот Кастриот Реџепи, којшто не се појави на собраниската седница за гласање доверба на владата во четвртокот, денеска одржа прес-конференција во Собранието.
Тој рече дека на денот на гласањето доверба на владата самоволно се засолнил за да не дозволи земјата да отиде во правец спротивен на неговите убедувања и стратешката определба.
„Се надевам дека разумот ќе надвладее во деновите пред нас, верувам дека се можни мостови меѓу нас, јас ќе се обидам да бидам еден од тие мостови. За земјата сега е важна стабилизација за да се справи со енергетската криза, пандемијата, не се потребни нови избори, не нов застој, не нови поделби, туку стабилно мнозинство“, изјави пратеникот Реџепи.
На прес-конференцијата тој додаде дека првично мислел во четвртокот да дојде и да гласа против интерпелацијата на владата, но така ќе бил единствениот пратеник што гласа така. Реџепи рече дека земјава не е скандинавска, па затоа донел одлука да се засолни, а за тоа не кажал ниту на семејството.
Реџепи појасни дека откога не се појавил во Собранието добивал пораки со закани по живот, при што ги известил институциите за тие пораки.
Инаку, пратеникот Кастриот Реџепи првично се потпиша на иницијативата на ВМРО-ДПМНЕ за свикување на собраниска седница за гласање доверба на владата, но откако не се појави на неа, лидерот на Движењето БЕСА Билјал Касами најпрво го пријави за исчезнат во полиција откако не се појави на седницата, а откога излезе на Фејсбук со свој став, БЕСА еден ден потоа го исклучи пратеникот Реџепи од своето членство.
