Повеќе од 200 пожарникари се обидуваат да го изгасат пожарот што изминатата ноќ го зафати облакодерот „Гренфел тауер“ во западен Лондон. Најмалку 50 лица се повредени, а според дел од британските медиуми, има и загинати, но не се соопштува нивниот број. Некои од станарите се блокирани на 27 кат од облакодерот со 120 станови.
„Би-би-си“ јавува дека непозната е судбината на „значаен број луѓе“ и дека постои опасност зградата да се урне.
Противпожарните служби соопштија дека со пожарот, кој е пријавен во 1.16 часот по локално време, се зафатени сите катови од вториот до 27 кат. Пожарникарите кои се на местото на настанот велат дека успеале да ги евакуираат станарите од 11. кат и дека условите се особено тешки. Засега не се знае колку лица биле во зградата во моментот кога избил пожарот.
Во близина на зградата се распоредени 45 пожарникари и 20 амбулантни возила.
Полицијата ги евакуира и околните згради поради можност пламените јазици да се прошират и на соседните објекти, а го затвори и автопатот А40, прометна сообраќајница која води кон центарот на Лондон.
Исто така затворени се и станиците на метрото, кои се наоѓаат под овој кварт.
Градоначалникот на Лондон, Садик Кан, изјави дека станува збор за „сериозен инцидент“.
