Земјотрес со јачина од 3,8 степени според Рихтеровата скала утрово повторно ја стресе областа Петриња, а хрватските медиуми јавуваат дека многу жители на тоа место излегле од страв на улиците.

Земјотресот е регистриран во 9.03 часот, на три километри југозападно од Сисак на длабочина од два километри. Интензитетот во епицентарот изнесувал 5 степени според Европската макросеизмичка скала.

Земјотресите во подрачјето на Петриња почнаа на крајот на минатата година, на 29 декември, кога по неколку помали потреси претходниот ден, се случи и разорниот земјотрес од 6,2 степени по Рихтер, кој нанесе големи штети. Оттогаш во поширокото подрачје се случија голем број земјотреси, со помал интензитет.

Како последица на потресите, од крајот на минатата година, во поширокото подрачје се отворија повеќе од 80 пропасти, односно дупки.