Повеќе од 80 лица загинаа во напад на милитантите на Исламска држава на ресторан на југот на Ирак, кој често е посетуван од шиити, соопштија денеска ирачките власти.

Во нападот, кој е изведен синоќа во градот Насирија, загинаа 84 лица, а 93 се повредени, соопшти гувернерот на провинцијата Ди Кар, Јахја ел Насири.

Седум од загинатите се по потекло од Иран, а уште 16 лица се повредени.

Ел Нисири рече дека шефот на разузнавачките служби е сменет и дека против него е поведена истрага.

Нападот почнал со пукање кај еден контролен пункт и ресторан долж главниот пат кој ја поврзува провинцијата со Багдад, а потоа се случиле уште два напади на бомбаши самоубијци, од кои еден бил изведен со автомобил наполнет со експлозив.