Извикувајќи „Убијци, убијци“, „Крвници, крвници“, „Оставка, оставка“, „Нема правда, нема мир“, повеќе од 1.500 граѓани денеска се собраа пред Владата на Република Македонија на протестот „Правда за Мартин, слобода за сите“.
На протестот, организиран од опозициската партија СДСМ, се приклучи и коалицијата „Граѓани за Македонија“, а во првите редови се мајката и братот на Мартин Нешковски, кој пред четири години беше убиен од полициски припадник за време на прославата на изборната победа на ВМРО-ДПМНЕ.
– Целата ситуација се затаи од врвот на власта. Затоа и беа тие тужби вчера поднесени. И настанот пред четири години, како и тие пред некој ден на протестите, се последица на нефункционалноста на институциите. Ги повикуваме да ги ослободат сите кои се затворени. Тоа е народ кој се бори за да профункционираат државата и институциите. Тоа е народ кој сака слободно да живее, тоа не е народ кој излегува на улиците за да бара непријател меѓу полицајците, туку народ кој сака да биде слободен во сопствената држава – рече Александар Нешковски, братот на убиениот Мартин.
Александар Нешковски исто така ги повика институциите да покажат доблест и да почнат да си ја вршат работата и истакна дека очекува правда и правна разврска.
На насобраните демонстранти им се приклучи и лидерот на СДСМ, Зоран Заев, кој беше дочекан со извици „Ние не сме партија, ние не сме партија“. Потоа, демонстрантите, заедно со Заев, кој не беше во првите редови, се упатија кон Министерството за внатрешни работи. Демонстрантите, извикувајќи „Стоп за полициската бруталност“, „Да не се заборави убиството“, побараа вмешаните во притајувањето на случајот да бидат изнесени пред суд и правдината да излезе на виделина.
По завршувањето на протестот, во 20 часот, на тема „Збогум Никола“, во Кампот на слободата ќе се обратат Павле Богоевски, Ирена Ристиќ, Васко Лазаревски и Едмонд Адеми.
